Náum vonandi enn lengra

„Það hefðu verið pínu­von­brigði ef markið hefði verið tekið af,“ seg­ir Jakob Snær Árna­son, marka­skor­ari KA-manna, en hann var einn af bestu mönn­um vall­ar­ins þegar KA-menn unnu mik­il­væg­an 1:0 útisig­ur á Val á Hlíðar­enda í dag. Jakob seg­ir að sér hafi þótt sitt lið hafa unnið vel fyr­ir mark­inu á þeim tíma, en þeir höfðu þá verið nokkuð sterk­ari í seinni hálfleik, á meðan Vals­menn hefðu vel getað tekið for­yst­una í fyrri hálfleik.

Aðstoðardóm­ari lyfti sem sagt flaggi sínu til marks um rang­stöðu, en Pét­ur Guðmunds­son, sem átti mjög góðan dag sem dóm­ari, sá hins veg­ar að fyr­ir­gjöf Hall­gríms Mar Stein­gríms­son­ar hafði átt viðkomu í Sebastian Hed­l­und, varn­ar­manni Vals, en ekki KA-manni, og dæmdi því að markið ætti að standa.

„Það er alltaf sætt að skora, sér­stak­lega þegar markið tel­ur svona mikið,“ seg­ir Jakob og bæt­ir við að hann hafi verið ró­leg­ur þegar flaggið fór á loft, því að hann hafi ekki talið sig vera rang­stæðan. „Ég treysti bara Pétri fyr­ir þessu, og sætt að þetta hafi talið og gefið okk­ur þetta mikið.“

Stefna eins hátt og mögu­legt er

Markið hans Jak­obs gef­ur KA-mönn­um raun­ar mjög mikið, þar sem Vík­ing­ar mis­stigu sig gegn KR, og eru Vík­ing­ur og KA því jöfn að stig­um í 2. og 3. sæti, en marka­tala Vík­inga er betri. „Það var held­ur ekki verra þegar við frétt­um af því [jöfn­un­ar­marki KR gegn Vík­ing­um], þannig að þetta ger­ir mótið bara meira spenn­andi. Efstu tvö sæt­in eru þau sem gefa Evr­ópu og það hef­ur verið okk­ar mark­mið, og von­andi náum við enn lengra,“ seg­ir Jakob Snær.

-Þið setjið markið sem sagt eins hátt og mögu­legt er? „Já, að sjálf­sögðu! Töl­fræðilega get­um við ennþá farið alla leið og meðan það er hægt, þá að sjálf­sögðu stefn­um við þangað,“ seg­ir Jakob Snær og bæt­ir aðspurður við að hið nýja fyr­ir­komu­lag móts­ins, þar sem efstu sex liðin spila inn­byrðis í síðustu fimm um­ferðunum bæti klár­lega við spenn­una sem fylgi Íslands­mót­inu.

„Klár­lega, og það er bara gam­an að sjá hvernig þetta mun þró­ast. Þetta er fyrsta tíma­bilið sem þetta er reynt og það er mjög spenn­andi að taka þátt í þessu. Þetta gæti gefið betri leiki í lok móts­ins og auðvitað von­um við það fyr­ir bæði leik­menn og áhorf­end­ur,“ seg­ir Jakob Snær að lok­um.

• Blogga um frétt