Bjarni hættur með Njarðvíkinga

Bjarni Jó­hanns­son hef­ur látið af störf­um sem þjálf­ari karlaliðs Njarðvík­ur í knatt­spyrnu eft­ir að hafa stýrt liðinu til glæsi­legs sig­urs í 2. deild karla í ár.

Njarðvík­ing­ar höfðu tals­verða yf­ir­burði í deild­inni og leika á ný í 1. deild á næsta ári eft­ir þriggja ára fjar­veru.

Bjarni hef­ur þjálfað meist­ara­flokkslið frá ár­inu 1985 með ör­stutt­um hlé­um, en tíma­bil­in sem meist­ara­flokksþjálf­ari eru 34 tals­ins. Hann varð í sum­ar fyrst­ur allra til að stýra liði í 600 leikj­um á Íslands­mót­inu og þar af eru 256 leik­ir í efstu deild karla.

Bjarni vann Íslands- og bikar­meist­ara­titl­ana með ÍBV árin 1997 og 1998 en liðið var tvö­fald­ur meist­ari fyrra árið. Þá urðu Fylk­is­menn bikar­meist­ar­ar und­ir hans stjórn árið 2001. Bjarni hef­ur þjálfað karlalið alla tíð en auk áður­nefndra fé­laga hef­ur hann þjálfað Þrótt í Nes­kaupstað, Tinda­stól, Grinda­vík, Breiðablik, Stjörn­una, KA og Vestra, ásamt því að vera aðstoðarþjálf­ari Ásgeirs Sig­ur­vins­son­ar hjá Fram og aðstoðarþjálf­ari Eyj­ólfs Sverris­son­ar með karla­landslið Íslands.

Hann var að ljúka sínu öðru tíma­bili með Njarðvík­urliðið. 

Njarðvík­ing­ar skýrðu frá þessu í dag og þar kom fram að Bjarni hefði ákveðið að fram­lengja ekki samn­ing sinn við knatt­spyrnu­deild fé­lags­ins.

• Blogga um frétt