Leikur sem við erum búnar að bíða eftir

Sandra Sig­urðardótt­ir markvörður ís­lenska landsliðsins í fót­bolta er spennt fyr­ir leikn­um gegn Portúgal á þriðju­dag. Sig­ur­veg­ar­inn í leikn­um trygg­ir sér sæti á loka­móti HM á meðan tapliðið sit­ur eft­ir með sárt ennið.

„Loks­ins erum við að fara að mæta í leik sem við erum bún­ar að bíða eft­ir. Þær eru vax­andi og spiluðu fínt á EM á köfl­um,“ sagði Sandra við KSÍ TV.

Portúgal leik­ur á heima­velli, en ís­lenska liðið hef­ur æft í Al­gar­ve und­an­farna daga. „Við lát­um það ekki trufla okk­ur. Við erum bún­ar að vera hérna í nokkra daga og okk­ur líður eins og heima. Við lát­um það telja,“ sagði hún.

Leikið er til þraut­ar á þriðju­dag og gæti það þýtt víta­spyrnu­keppni. Hvernig und­ir­býr markvörður sig fyr­ir víta­keppni?

„Ég fæ klipp­ur af vít­um hjá leik­mönn­um, aðal­víta­skytt­un­um. Ég reyni að sjá hvort það sé eitt­hvað munst­ur. Ann­ars reyni ég bara að leysa það í augna­blik­inu og taka ein­hverja sénsa,“ sagði Sandra.

• Blogga um frétt