Agla María áfram í Kópavoginum

Agla María Albertsdóttir hefur skrifað undir nýjan samning við knattspyrnudeild Breiðabliks. Nýi samningurinn gildir út tímabilið 2024.

Samningur hinnar 23 ára gömlu Öglu Maríu við Breiðablik rann út í lok síðasta árs en nú er ljóst að hún verður áfram í herbúðum uppeldisfélagins næstu tvö tímabil.

Hún hóf meistaraflokksferilinn aðeins 15 ára gömul með Val er hún lék átta leiki og skoraði tvö mörk í úrvalsdeildinni.

Agla María söðlaði þá um og lék með Stjörnunni í tvö tímabil áður en hún hélt aftur til Breiðabliks fyrir tímabilið 2018.

Þar hefur hún leikið undanfarin ár, fyrir utan hálft tímabil á síðasta ári þar sem hún var á mála hjá sænska úrvalsdeildarfélaginu Häcken.

Agla María er fjórði markahæsti leikmaður kvennaliðs Breiðabliks frá upphafi með 110 mörk í 146 leikjum í öllum keppnum. Hún hefur skorað 60 mörk í 119 leikjum í efstu deild, þar af 50 mörk í 77 leikjum fyrir Breiðablik.

Hún á 53 A-landsleiki að baki, þar sem hún hefur skorað fjögur mörk. Var Agla María í lokahópi Íslands á EM 2017 og 2022.

• Blogga um frétt