Fagnar aukinni umræðu og áhuga

Stjórn knattspyrnudeildar Breiðabliks hefur sent frá sér yfirlýsingu vegna umræðu um knattspyrnu kvenna að undanförnu. Í henni er aukinni umræðu og áhuga á kvennaknattspyrnu fagnað.

Fyrirliðar liðanna tíu í Bestu deild kvenna sendu frá sér yfirlýsingu á dögunum þar sem Íslenskur toppfótbolti, hagsmunasamtök liða í efstu tveimur deildum karla og kvenna, voru gagnrýnd. Þótti fyrirliðunum kvennaknattspyrna ekki sitja við sama borð.

ÍTF hefur að undanförnu leitað leiða til þess að bæta sambandið við kvennaliðin tíu og fundaði í gær með forráðaaðilum úr Bestu deild kvenna. Í yfirlýsingu ÍTF frá því í gær kom fram að um gagnlegan fund hafi verið að ræða, þar sem rætt var opinskátt um markaðssetningu deildarinnar og það sem betur mætti fara.

Yfirlýsing stjórnar knattspyrnudeildar Breiðabliks:

„Stjórn knattspyrnudeildar Breiðabliks fagnar af heilum hug aukinni umræðu og áhuga á knattspyrnu kvenna, hvort sem það snýr að kynningarmálum, aðstöðumálum eða öðru.
Þar má sérstaklega nefna eftirtektarverða samstöðu fyrirliða í Bestu deild kvenna undanfarna daga.

Knattspyrnudeild Breiðabliks leggur áherslu á að í þeim samtökum eða verkefnum sem félagið er aðili að sé ætíð fyllsta jafnréttis gætt og að aldrei halli á hvort kyn.
Á síðustu árum hefur leiknum sannarlega verið breytt þannig að áhugi og áhorf á knattspyrnu kvenna hefur aukist verulega.

Af þeim sökum er mikilvægt að allir sem að því verkefni koma séu samstíga og gæti vel að framsetningu og markaðssetningu enda er auðvelt að misstíga sig og falla út af sporinu. Nú skiptir máli að ÍTF, félögin og leikmenn nái að byggja upp traust sín á milli og að lærdómur verði dreginn af atburðarrás síðustu daga. Knattspyrnudeild Breiðabliks mun beita sér í þeirri vegferð.

Við í Breiðabliki höfum á vettvangi KSÍ og annars staðar talað fyrir sjónarmiðum jafnréttis og jafnræðis með margvíslegum tillöguflutningi og umræðu og munum halda því áfram af öllu okkar afli. Við viljum eiga gott samstarf með öllum þeim sem vilja vinna að vexti og hag knattspyrnu kvenna og halda áfram að leggja okkar af mörkum en um leið vera óhrædd við að benda á það sem betur má fara.“

• Blogga um frétt