Íþróttir | Íslenski fótboltinn | mbl | 29.4.2023 | 18:50 | Uppfært 19:46

Enn með fullt hús stiga

Hrannar Mar Hallgrímsson úr KA og Birnir Snær Ingason hjá Víkingi eigast við í kvöld. mbl.is/Óttar Geirsson

Víkingar náðu mikilvægum þremur stigum í hús á heimavelli í kvöld, en þeir náðu að vinna KA með einu marki gegn engu í 4. umferð Bestu deildar karla. Sigurmarkið kom á 87. mínútu og skoraði Gunnar Vatnhamar það með laglegum skalla eftir góða fyrirgjöf frá Karli Friðleifi Gunnarssyni.

Víkingar eru á toppi deildarinnar með tólf stig eftir fyrstu fjóra leikina, fullt hús stiga, en KA-menn máttu bíða sinn fyrsta ósigur í sumar, og sitja eftir í sjötta sæti með fimm stig.

Það var augljóst frá fyrstu mínútu leiksins að hér voru tvö af sterkari liðum deildarinnar að mætast. Þannig mættu KA-menn mjög einbeittir til leiks, og pressuðu Víkingana mjög framarlega á vellinum. Náðu þeir þannig að byggja upp mjög góða pressu á toppliðið, án þess þó að skapa sér mörg færi.

Á 25. mínútu var Arnari Gunnlaugssyni, þjálfara Víkings, greinilega ekki farið að lítast á blikuna, og kallaði hann hvatningarorð inn á völlinn til sinna manna. Hvort að það hafi skipt sköpum eða ekki er óvíst, en víst er að upp frá því fór Víkingum að vaxa ásmegin, því einungis mínútu síðar átti Birnir Snær Ingason hættulegasta færi fyrri hálfleiksins, þegar hann skaut í þverslá og yfir.

Víkingar voru með undirtökin það sem eftir lifði fyrri hálfleiks, en KA-menn héldu þó uppi góðri baráttu gegn toppliðinu. Hvorugt liðið skapaði sér þó mikið af færum og var staðan markalaus í leikhléi.

Síðari hálfleikur hófst líkt og sá fyrri með því að KA-menn settu mikla pressu á heimamenn. Þannig hefðu þeir vel getað komist yfir á 57. mínútu þegar Dusan Brkovic fékk góðan skalla eftir hornspyrnu, og svo aftur á 61. mínútu þegar Ingvar Jónsson, markvörður Víkinga, fór ekki út á móti stungusendingu gestanna, og fengu þeir Bjarni Aðalsteinsson og Ásgeir Sigurgeirsson því bæði fínustu færi á að skora, en Ingvar varði í tvígang og bætti þannig fyrir mistök sín.

Strax í kjölfarið, eða á 63. mínútu, ákvað Arnar að gera þrefalda skiptingu á sínu liði, og er óhætt að segja að hún hafi hleypt Víkingum kapp í kinn, því að þeir höfðu öll tögl og hagldir á leiknum eftir skiptinguna. KA-menn voru þó vel skipulagðir og vörðust vel, og virtist jafnvel sem að liðin myndu skiptast á jafnan hlut.

Eitthvað varð þó undan að láta, og Víkingar náðu loksins að brjóta ísinn á 87. mínútu, en þá tók varamaðurinn Karl Friðleifur á rás upp hægri vænginn. Sprengdist þannig upp vörn KA-manna, sem hafði verið mjög traust fram að því, og kom Gunnar Vatnhamar, sem var aðallega í varnarsinnuðu miðjuhlutverki í leiknum, hlaupandi inn í teiginn og skallaði boltann framhjá Steinþóri í marki KA.

KA-menn reyndu allt hvað þeir gátu til þess að jafna leikinn eftir þetta, en uppbótartíminn var fimm mínútur. Það var þó nokkuð einkenni á uppbótartímanum að dómari leiksins, Vilhjálmur Alvar, sem hafði verið mjög góður fram að því, fór að dæma á litla pústra á milli leikmanna og stöðva leikinn trekk í trekk. Fór það nokkuð í taugarnar á KA-mönnum, og endaði það með því að Sævar Pétursson, framkvæmdastjóri KA, sem skráður var sem liðsstjóri, lét miður falleg orð falla af vörum og fékk við það rautt spjald. Höfðu KA-menn ekki erindi sem erfiði á þessum lokamínútum og Víkingarnir sigldu mikilvægum sigri fremur þægilega í höfn.

Það má hrósa báðum liðum fyrir góða knattspyrnu, sérstaklega fyrir þennan árstíma, en ljóst er að hvorugt liðið má kallast árennilegt fyrir önnur lið deildarinnar. Munurinn í kvöld var þó sá, að Víkingarnir náðu að standa af sér hápressu gestanna í byrjun beggja hálfleikja og byggja upp sífellt þyngri sóknir, sem á endanum skiluðu af sér marki og mikilvægum þremur stigum. KA-menn hefðu hins vegar vel getað fengið meira fyrir sinn snúð, hefðu þeir nýtt þá spilkafla betur þegar þeir voru með yfirhöndina.