Íþróttir | Íslenski fótboltinn | mbl | 2.5.2023 | 13:45

Verð kominn á elliheimili þegar það breytist

Gunnhildur Yrsa Jónsdóttir og Þorsteinn Halldórsson á góðri stundu. Ljósmynd/KSÍ

„Ég er bara ágætlega sáttur með dráttinn og ég var sjálfur að vonast til þess að við myndum mæta Danmörku,“ sagði Þorsteinn Halldórsson, þjálfari íslenska kvennalandsliðsins í knattspyrnu, eftir að dregið var í riðla í Þjóðadeild UEFA í dag en keppnin hefst næsta haust.

Frétt af mbl.is

Ísland mætir Þýskalandi, Danmörku og Wales

„Þetta eru allt góð lið sem við erum að fara mæta og fyrirfram eru Þjóðverjarnir klárlega sterkasta liðið í riðlinum. Leikirnir gegn Danmörku og Wales eru svo bara 50/50 leikir að mínu mati. Danmörk var í neðsta liðið í öðrum styrkleikaflokki og Wales var í þriðja sæti í fjórða styrkleikaflokki þannig að ég er bara þokkalega bjartsýnn fyrir þessari keppni.

Markmiðið okkar verður fyrst og fremst að halda okkur í A-deildinni. 16 sterkustu þjóðir Evrópu leika í A-deildinni þannig að það má alveg segja sem svo að styrkleikinn sé svipaður og í lokakeppni EM. Við verðum því ekki í einhverri tilraunastarfsemi í Þjóðadeildinni heldur er markmiðið að stilla upp sínu sterkasta liði,“ sagði Þorsteinn.

Berglind Björg Þorvaldsdóttir og Þorsteinn Halldórsson fara yfir málin fyrir leik Íslands og Hollands í undankeppni HM í september á síðasta ári. mbl.is/Kristinn Magnússon

Sorgleg niðurstaða

Ísland mun leika heimaleikina sína þrjá á fyrstu fjórum leikdögunum í september og október og enda svo á útileikjunum þar ekki er hægt að leika á Laugardalsvelli á þeim tíma.

„Auðvitað hefði verið skemmtilegra að geta dreift heima- og útileikjunum eitthvað og vera ekki í þeirri stöðu að eiga þrjá útileiki eftir mögulega. Við búum hins vegar á Íslandi og við eigum okkar frábæra heimavöll sem er Laugardalsvöllur. Ég verð kominn á elliheimili þegar það breytist, reikna ég með, en þangað til verðum við að gera okkur það að góðu að spila á Laugardalsvelli í núverandi mynd.“

Fari svo að íslenska liðið endi í þriðja sæti riðilsins fer liðið í umspil um sæti í A-deildinni við lið úr B-deild Þjóðadeildarinnar og verða þeir leikir leiknir í febrúar.

„Ef við lendum í þriðja sætinu förum við í umspilsleiki sem verða leiknir heima og að heiman. Staðan er einfaldlega sú að við eigum engan heimavöll til þess að spila á í febrúar og við þyrftum því að spila heimaleikinn í öðru landi, sem er gríðarlega sorgleg niðurstaða,“ bætti Þorsteinn við í samtali við mbl.is.