„Geggjað að ná að troða inn einu“

„Þetta var þvílíkur iðnaðarsigur. Það var jafnteflislykt af þessu en geggjað að ná að troða inn einu eftir hornspyrnu,“ segir Ægir Jarl Jónasson, hetja KR, eftir 1:0-sigur Vesturbæinga á Stjörnunni í Bestu deild karla í kvöld.

Ægir Jarl skoraði eina mark leiksins á 79. mínútu, með skalla eftir hornspyrnu Jóhannesar Kristins Bjarnasonar. Með sigrinum lyfti KR sér upp í níunda sæti deildarinnar en liðið er með tíu stig.

Jafnræði var með liðunum í fyrri hálfleik en KR-ingar ívið sterkari í þeim síðari.

„Við vorum að skapa meira í seinni og það er kærkomið að klára þetta á heimavelli,“ segir Ægir sem var ánægður með að hafa skorað eina mark leiksins.

Markaskorarinn glotti þegar hann var spurður um ástandið á vellinum en Meistaravellir hafa oft verið grænni og fegurri á þessum tíma árs. „Hann er allur að koma til. Vonandi verður hann betri þegar það kemur aðeins meiri sól.“

KR-ingar hafa nú unnið þrjá leiki í röð, tvo í deild og einn í bikar en höfðu áður tapað fimm deildarleikjum í röð. Ægir Jarl segir allt á réttri leið í Vesturbænum:

„Við erum að byggja ofan á eitthvað núna.“

• Blogga um frétt