„Annar leggst og vælir en hinn ekki“

Arnór Ingvi Traustason lék vel á miðri miðjunni hjá Íslandi þegar liðið tapaði 0:1 fyrir Portúgal í undankeppni EM 2024 á Laugardalsvelli í kvöld.

„Líðanin er eiginlega ekki góð. Þetta er mjög svekkjandi og heppnin einhvern veginn ekki okkar megin í þessu verkefni. En góðar frammistöður hjá mörgum og liðinu í báðum þessum leikjum.

Það er stígandi í þessu hjá okkur og stöðugleiki sem við erum að sýna. Þannig að það er alveg eitthvað sem við getum byggt ofan á. En það er mjög svekkjandi að fara með 0 stig út úr þessu verkefni,“ sagði Arnór Ingvi í samtali við mbl.is eftir leik.

Frétt af mbl.is

Ronaldo kramdi íslensk hjörtu

Aðspurður kvaðst hann ánægður með eigin frammistöðu á miðsvæðinu í kvöld.

„Já, ég er gífurlega sáttur. Mér leið mjög vel inni á vellinum og fékk mikla hjálp frá liðinu, það var góð holning á liðinu, sem náði að gera mér auðvelt fyrir.“

Arnór Ingvi var annar af djúpum miðjumönnum ásamt Jóhanni Berg Guðmundssyni. Hann hefur spilað þessa stöðu allt yfirstandandi tímabil með félagsliði sínu, Norrköping í Svíþjóð.

„Já, við erum búnir að vera að spila 4-2-3-1 í vetur. Ég er mjög vanur að spila þessa stöðu.“

Ég er ekki VAR-dómari

Spurður hvort hann hefði séð umdeilt sigurmark Portúgals aftur sagði Arnór Ingvi:

„Ég sá einhverja endursýningu af þessu þar sem tveir eru að koma úr rangstöðu og einn þeirra fer í bakið á Herði [Björgvini Magnússyni]. En ég veit ekki, ég er ekki VAR-dómari og get ekki sagt til um þetta!“

Frétt af mbl.is

Átti mark Ronaldos að standa?

Hann tjáði sig þá um síðara gula spjaldið sem Willum Þór Willumsson fékk og þar með rautt.

„Tveir fara í tæklingu, annar leggst og vælir en hinn ekki.“

Arnór Ingvi sagði ekkert í leik Portúgals hafa komið íslenska liðinu á óvart.

„Nei, ekkert þannig. Þeir eru náttúrlega góðir í fótbolta og líður vel með boltann en voru einhvern veginn ekkert að skapa mikið.“

Gerum okkur erfiðara fyrir

Útlitið í J-riðlinum er orðið nokkuð dökkt en Njarðvíkingurinn sagði að það eina sem Ísland gæti gert úr þessu væri að byrja að vinna leiki.

„Við fáum 0 stig út úr þessu verkefni og erum að gera okkur erfiðara fyrir. Við þurfum að fara að vinna fótboltaleiki til þess að eiga séns á einhverju.

Ég er ekki búinn að skoða hvernig hinir leikirnir fóru en við þurfum bara að einblína á okkur núna, að hætta að treysta á aðra og fara að vinna leiki,“ sagði Arnór Ingvi að lokum.

• Blogga um frétt