Glæsilegur Blikasigur í Dublin

Breiðablik vann gífurlega sterkan sigur á Shamrock Rovers, 1:0, í fyrri leik liðanna í 1. um­ferð undan­keppni Meist­ara­deild­ar karla í fót­bolta á Tallag­ht-leik­vang­in­um í Dublin í kvöld. 

Þetta var fyrsti leikur Íranna í keppninni í ár en Blikar fóru í forkeppni þar sem þeir unnu meistaralið San Marínó og Svartfjallalands með talsverðum yfirburðum.

Blikaliðið náði fljótt frumkvæðinu og var yfir í baráttunni nánast allan hálfleikinn. Færeyingurinn Klæmint Olsen fékk tvö hörkuskallafæri á fyrstu 20. mínútum leiksins en í bæði skipti sá Leon Pöhls markvörður Shamrock við honum. 

Blikar héldu sínum upphlaupum áfram en lítið var að frétta í sóknarleik heimamanna, en besta færi þeirra kom á 15. mínútu þegar Rory Gaffney slapp einn í gegn en Anton Ari Einarsson varði vel frá honum. 

Blikaliðið hélt pressunni áfram og á 39. mínútu skilaði það sér. Þá fengu Kópavogsmenn aukaspyrnu tiltölulega langt frá teignum, Viktor Karl Einarsson rúllaði boltanum á Damir Muminovic sem hamraði boltanum upp í þaknetið af löngu færi þar sem Pöhls kom engum vörnum að. Blikaliðið var þar með komið í 1:0, sem var afar verðskuldað. 

Síðari hálfleikurinn var mun rólegri en Shamrock-menn byrjuðu hann af miklum krafti. Blikar náðu þó fljótt að róa leikinn niður og héldu því þannig mest allan síðari hálfleikinn. 

Á síðustu 20 mínútunum fóru svo Blikar að fá aftur góð tækifæri. Helsta var skot Viktors Karls sem Pöhls varði vel. 

Sean Kavanagh fékk svo besta færi síðari hálfleiksins er hann var með boltann í frábærri skotstöðu inn í teig. Skotið var aftur á móti afleitt og fór lengst fram hjá, en þar sluppu Blikar með skrekkinn. 

Að lokum sigldu Blikar fræknum og verðskulduðum 1:0-sigri heim í Kópavoginn.

Seinni leikur liðanna fer fram á Kópavogsvelli á þriðjudaginn, eftir viku, þann 18. júlí, klukkan 19.15.