Íþróttir | Íslenski fótboltinn | mbl | 7.8.2023 | 21:00 | Uppfært 8.8.2023 10:14

Segir liðið vera að grafa djúpt

Hallgrímur Jónasson, þjálfari KA, í fyrri leik KA og Vals á Akureyri í vor. Ljósmynd/Kristín Hallgrímsdóttir

Hallgrímur Jónasson, þjálfari KA, segir í samtali við mbl.is sigur Vals á KA á Hlíðarenda í dag hafa verið fyllilega sanngjarnan.

Valur vann leikinn 4:2 og kláraði liðið má segja leikinn í fyrri hálfleik.

Sannfærandi sigur Vals á Hlíðarenda

„Svo er það bara næsti og svo næsti og svo næsti“

Ekki ánægður með orkustigið

„Ég var ekki ánægður með orkustigið hjá okkur í byrjun leiks, það vantaði smá upp á það og þá er þetta bara erfitt.“

Segist hann þó gríðarlega ánægður með seinni hálfleikinn og vera ánægður með þá sem komu inn á.

„Við komum inn í seinni hálfleikinn í erfiðri stöðu á móti frábæru liði Vals á útivelli og skorum tvö mörk og gerum þetta að leik aftur. Við fengum færi til að skora fleiri. Ég er gríðarlega ánægður með það.“

Hallgrímur segir KA vera í rosa prógrammi og að liðið sé að grafa djúpt.

„Menn eru bara að læra og þurfa að átta sig á því að þegar þeir koma heim eftir svona skemmtilegt bikarævintýri þá þarf maður að finna út úr því hvernig maður geti komið með 100% orkustig svo lengi sem ég er inn á. Mér fannst við feila aðeins þar.

Við vorum ekki nógu grimmir í fyrri hálfleik og Valur komst upp með að fá mikinn tíma á boltanum og þá endar þú með að hlaupa miklu meira en ef þú ert með aðeins betra orkustig. Það er það sem við ætlum að læra af þessu.“

„Þú kemst ekki áfram á því að liggja og verjast allan tímann“

KA er á leið til Belgíu þar sem Club Brugge bíður í 3. umferð undankeppni Sambandsdeildar Evrópu á fimmtudag. Það er gríðarlega þungt verkefni fyrir íslenskt lið en Hallgrímur er hvergi banginn.

„Við þurfum að verjast vel, við þurfum að trúa á sjálfa okkur og þora að spila boltanum. Það er allt hægt ef menn gera hlutina vel. Þú kemst ekki áfram á því að liggja og verjast allan tímann.“