Sögulegur sigur Víkings í bikarúrslitum

Víkingur úr Reykjavík varð í kvöld bikarmeistari kvenna í fótbolta í fyrsta sinn eftir 3:1-sigur á Breiðabliki í úrslitaleik á Laugardalsvelli í kvöld.

Sigurinn er sérstaklega merkilegur fyrir þær sakir að Víkingur spilar í 1. deildinni og er fyrsta félagið utan efstu deildar sem verður bikarmeistari í kvennaflokki.

Víkingsliðið var ekki lengi að komast yfir, því Linda Líf Boama átti fallega sendingu inn í vítateig Breiðabliks eftir tæplega 50 sekúndna leik og Nadía Atladóttir mætti í teiginn og skoraði af miklu harðfylgi.

Víkingar fagna öðru markinu í kvöld. mbl.is/Eggert Jóhannesson

Kortéri síðar var staðan orðin jöfn, 1:1. Birta Georgsdóttir skoraði þá glæsilegt mark, en hún afgreiddi boltann í slána og inn með föstu skoti eftir að hafa leikið á nokkra leikmenn Víkinga.

Víkingar voru hins vegar ekki á þeim buxunum að gefast upp, því Nadía kom 1. deildarliðinu aftur yfir á 43. mínútu þegar hún skoraði aftur af stuttu færi, nú eftir fyrirgjöf frá Emmu Steinsen Jónsdóttur frá hægri kantinum. Var staðan í hálfleik því óvænt 2:1, Víkingi í vil.

Nadía Atladóttir fagnar öðru marki sínu í kvöld. mbl.is/Eggert

Víkingsliðið gaf fá færi á sér framan af í seinni hálfleik, gegn toppliði Bestu deildarinnar. Sigurborg Katla Sveinbjörnsdóttir markvörður þurfti ekki oft að taka á honum stóra sínum.

Gott kvöld Víkinga varð svo fullkomið á 87. mínútu þegar Freyja Stefánsdóttir nýtti sér mistök í vörn Breiðabliks, hirti boltann af aftasta varnarmanni og skoraði þriðja markið, mínútu eftir að hún kom inn á sem varamaður.

Nadía Atladóttir skorar í kvöld. Elín Helena Karlsdóttir kemur ekki vörnum við. mbl.is/Eggert Jóhannesson

Átti Breiðablik engin svör eftir það og stórkostlegur sigur Víkingsliðið staðreynd.

Víkingur R.	3:1	Breiðablik	Opna lýsingu Loka
90. mín. Þremur mínútum bætt við. Þetta er að detta í hús hjá Víkingum.
Augnablik — sæki gögn...

• Blogga um frétt