„Næstu dagar verða mikil áskorun“

Kristinn V. Jóhannsson, vallarstjóri á Laugardalsvelli, setti inn áhugaverða færslu á samfélagsmiðilinn X, áður Twitter, í gærkvöldi.

Breiðablik tekur á móti Maccabi Tel Aviv frá Ísrael í síðasta heimaleik sínum í B-riðli Sambandsdeildar Evrópu á fimmtudaginn kemur á Laugardalsvelli.

Það er nóg að gera hjá vallarstarfsmönnum Laugardalsvallar þessa dagana að halda vellinum góðum fyrir leikinn á fimmtudaginn en starfsmenn hafa notast við hitapulsu á vellinum til þess að reyna halda honum í sem besta ásigkomulagi fyrir fimmtudaginn.

„Það er spáð frosti á þriðjudaginn og næstu dagar verða því mikil áskorun,“ skrifaði Kristinn á X.

Breiðablik er án stiga í neðsta sæti riðilsins eftir fjórar umferðir en liðið mætir svo Zoryu Luhansk í lokaleik sínum í riðlinum í Lublin í Póllandi þann 14. desember.

• Blogga um frétt