Aðstoðarlandsliðsþjálfarinn eftirsóttur

Að minnsta kosti tvö sænsk félög hafa mikinn áhuga á Jóhannesi Karli Guðjónssyni, aðstoðarþjálfara íslenska karlalandsliðsins í knattspyrnu.

Þetta herma heimildir mbl.is og Morgunblaðsins.

Frétt af mbl.is

Arnar og Jóhannes berjast við sænskan aðstoðarlandsliðsþjálfara

Félögin sem um ræðir eru annars vegar Norrköping líkt og komið hefur fram og þá hefur hins vegar sænska B-deildarfélagið Öster einnig mikinn áhuga á Jóhannesi Karli. 

Sr­djan Tufegdzic lét af störfum sem þjálfari Öster að tímabilinu loknu og Alex Þór Hauksson yfirgaf félagið einnig á dögunum eftir þrjú ár í herbúðum þess.

Vilja ekki standa í vegi fyrir íslenskum þjálfurum

„Við gáfum honum leyfi til þess að fara í viðræður í Svíþjóð,“ sagði Jörundur Áki Sveinsson, yfirmaður knattspyrnumála hjá KSÍ, í samtali við mbl.is þegar hann ræddi málefni Jóhannesar Karls.

„Við viljum alls ekki standa í vegi fyrir íslenskum þjálfurum þegar möguleikinn er til staðar fyrir þá að þjálfa á erlendri grundu. Við eigum nokkra frábæra þjálfara á erlendri grundu og markmiðið er að fjölga þeim á næstu árum.

Við viljum sjá íslenska þjálfara stíga næsta skref því þeir eru svo sannarlega fullfærir um það og eiga það skilið líka. Auðvitað yrði erfitt að horfa á eftir Jóhannesi Karli sem er frábær þjálfari en þetta er líka frábært tækifæri fyrir hann og þannig viljum við horfa á það,“ sagði Jörundur Áki í samtali við mbl.is.

• Blogga um frétt