Geggjað að fylgjast með Breiðabliki

Arnar Gunnlaugsson, þjálfari Íslands- og bikarmeistara Víkings í knattspyrnu, segir að það hafi verið geggjað að fylgjast með Breiðabliki taka þátt í riðlakeppni Evrópumóts, fyrstu íslenskra karlaliða.

Blikar luku síðasta fimmtudag keppni í Sambandsdeild Evrópu en þeir léku samtals 48 mótsleiki frá 4. apríl til 14. desember og þar af sextán Evrópuleiki.

Frétt af mbl.is

Ég reyni að hugsa ekki of mikið um þetta

„Það hefur verið geggjað að fylgjast með Blikunum komast í riðlakeppni og læra af þeim. Þeir voru fyrstir til að gera þetta og líka að fara í gegnum þessa reynslu, að æfa frá desember til desember. Finna út hvernig á að haga sínum æfingum, hvernig á að gera breytingar á liðinu milli leikja yfir sumartímann og halda þannig öllum ferskum, jafnframt því að vera að keppa á öllum vígstöðvum. Þetta er gríðarleg áskorun fyrir þjálfara og fyrir félagið. Sem betur fer voru þeir fyrstir,” sagði Arnar og hló þegar mbl.is ræddi við hann í dag.

Frétt af mbl.is

Sterkasti hópur Íslandssögunnar?

Hann sagði að Víkingar hefðu búið sig vel undir að geta farið í jafnlangt tímabil og Blikar hafa nú lokið en þeir ætla sér að ná langt í Evrópukeppni á næsta ári.

„Það eru þrjú ár síðan við breyttum okkar æfingaformati. Eins og þetta er erlendis þá er  tímabilið tíu mánuðir, þú færð frí í fjórar vikur og undirbúningstímabilið er fjórar vikur. Þannig erum við búnir að haga okkur í þrjú ár og ættum því að vera tilbúnir í þetta.

Svo eru önnur lið kannski búin að haga sínum hlutum öðruvísi. Æft með það að markmiði að toppa í júní, eins og gengur og gerist í íslenskum fótbolta. En svo lengist tímabilið og þá tel ég okkur vera komna með smá forskot. En svo veit maður aldrei," sagði Arnar Gunnlaugsson þegar mbl.is ræddi við hann í kjölfarið á samningum við þrjá nýja leikmenn í hádeginu í dag.

• Blogga um frétt