„Ef hann yrði kosinn íþróttamaður ársins en yrði svo dæmdur í sínu máli þá kæmi það illa út,“ sagði Aron Elvar Finnsson, íþróttablaðamaður á mbl.is og Morgunblaðinu, í íþróttauppgjöri Dagmála þegar rætt var um knattspyrnumanninn Albert Guðmundsson.
Albert, sem er 26 ára gamall, var kærður fyrir kynferðisbrot í ágúst 2023 og kom þar af leiðandi ekki til greina í kjöri á leikmanni ársins hjá Knattspyrnusambandi Íslands líkt og 433.is greindi fyrst frá en það var þó hægt að kjósa Albert í kjörinu á íþróttamanni ársins.
„Hann er frábær leikmaður sem við gætum klárlega notað í landsliðinu og hann væri pottþétt á lista ef þetta mál væri ekki í gangi,“ sagði Aron Elvar.
„Hann hefur spilað frábærlega á Ítalíu þannig að þetta er fyrst og fremst leiðindamál,“ sagði Aron Elvar meðal annars.