Albert Guðmundsson varð í gærkvöld fyrstur til að skora tvær þrennur fyrir A-landslið karla í knattspyrnu í 78 ára sögu landsliðsins.
Hann er jafnframt aðeins þriðji Íslendingurinn til að skora þrennu fyrir landsliðið í mótsleik. Á undan honum voru Jóhann Berg Guðmundsson gegn Sviss árið 2013 og Aron Einar Gunnarsson gegn Liechtenstein árið 2023.
Svo merkilega vill til að allar þrjár þrennur Íslendings í mótsleik hafa verið skoraðar á útivöllum.
Albert skoraði áður þrennu í vináttulandsleik gegn Indónesíu, á útivelli, árið 2018 en Ísland vann þann leik 4:1.
Albert hefur nú skoraði níu mörk fyrir A-landslið Íslands og er átjándi leikmaðurinn frá upphafi sem hefur náð þeim leikjafjölda. Hann deilir nú 16.-18. sæti markalista landsliðsins með Skagafeðgunum Þórði Þórðarsyni og Teiti Þórðarsyni.
Íslensku þrennurnar (fernur meðtaldar) í landsleikjum karla eru orðnar 12 talsins og þær eru eftirtaldar:
*Ríkharður Jónsson skoraði öll fjögur mörk Íslands í 4:3-sigri á Svíum á Melavellinum 1951.
*Arnór Guðjohnsen skoraði fjögur mörk í 5:1-sigri á Tyrkjum á Laugardalsvellinum 1991.
*Teitur Þórðarson skoraði þrjú mörk í 6:0-sigri á Færeyingum á Laugardalsvellinum 1975.
*Ragnar Margeirsson skoraði þrjú mörk í 9:0-sigri á Færeyingum í Keflavík 1985.
*Þorvaldur Örlygsson skoraði þrjú mörk í 4:0-sigri á Eistum á Akureyrarvelli 1994.
*Bjarki Gunnlaugsson skoraði þrjú mörk í 3:0-sigri á Eistum í Tallinn 1996.
*Helgi Sigurðsson skoraði þrjú mörk í 5:0-sigri á Möltu á Laugardalsvellinum 2000.
*Tryggvi Guðmundsson skoraði þrjú mörk í 3:0-sigri á Indverjum í Cochin 2001.
*Jóhann Berg Guðmundsson skoraði þrjú mörk í jafntefli, 4:4, gegn Sviss í Bern 2013.
*Albert Guðmundsson skoraði þrjú mörk í 4:1-sigri á Indónesíu í Djakarta 2018.
*Aron Einar Gunnarsson skoraði þrjú mörk í 7:0-sigri á Liechtenstein í Vaduz 2023.
*Albert Guðmundsson skoraði þrjú mörk í 4:1-sigri á Ísrael í Búdapest 2024.