Valskonur eru enn með fullt hús stiga í Bestu deildinni í knattspyrnu eftir sigur á Tindastóli, 3:1, á Hlíðarenda í dag.
Valsliðið er þar með í efsta sæti deildarinnar með 15 stig eftir fimm leiki. Tindastóll er í fjórða sæti með 6 stig.
Hugrún Pálsdóttir kom Tindastóli óvænt yfir á tíundu mínútu leiksins. Þá átti hún skot utan teigs sem fór yfir Fanneyju Ingu Birkisdóttur markvörð og í netið.
Fanndís Friðriksdóttir jafnaði metin fyrir Val á 38. mínútu er hún lagði boltann í netið eftir frábæran samleik við Amöndu Andradóttur, 1:1.
Ekki nema tveimur mínútum síðar var Fanndís búin að skora annað mark. Þá fékk hún boltann frá Katie Cousins og smellti honum í netið, 2:1, og Valsliðið ekki lengi að snúa leiknum sér í vil.
Valur skoraði þriðja markið strax í byrjun seinni hálfleiks. Þá stangaði Guðrún Elísabet Björgvinsdóttir fyrirgjöf Camryn Paige Hartman í netið og Valsliðið í frábærri stöðu, 3:1.
Valskonur heimsækja Breiðablik næst í stórleik umferðarinnar. Tindastóll fær Þór/KA í heimsókn.