Varnarmennirnir reyndu Birkir Már Sævarsson úr Val og Halldór Smári Sigurðsson úr Víkingi náðu báðir stórum áfanga í 11. umferð Bestu deildar karla í fótbolta á laugardaginn.
Þeir léku báðir sinn 200. leik í efstu deild hér á landi.
Birkir, sem verður fertugur í haust, hefur leikið alla 200 leikina fyrir Val og er sjöundi leikmaður félagsins sem nær þeim áfanga. Hann hefur þó leikið meirihluta ferilsins erlendis en auk 11 leikja fyrir Val í 1. deild árið 2004 lék Birkir 252 leiki í efstu deildum Noregs og Svíþjóðar. Hann á því 463 deildaleiki að baki í dag og er kominn í 12. sætið yfir leikjahæstu Íslendinga í deildakeppni heima og erlendis frá upphafi en hann deilir því sæti með Rúnari Kristinssyni, núverandi þjálfara Fram.
Halldór Smári, sem er 35 ára, hefur spilað alla 200 leikina fyrir Víking og er annar leikmaður félagsins, á eftir Magnúsi Þorvaldssyni til að ná þeim áfanga. Samtals hefur Halldór spilað 280 deildaleiki á ferlinum, alla hér á landi en hann er eini leikmaður Víkings sem hefur spilað 400 leiki í öllum mótum fyrir félagið. Hann mun vera kominn með 455 leiki í dag.
Tryggvi Hrafn Haraldsson skoraði tímamótamark þegar Valur vann Vestra, 5:1, á Ísafirði. Það var hans 50. mark í efstu deild og er Tryggvi 64. leikmaðurinn í sögu Íslandsmótsins sem nær þeim markafjölda. Í þeim hópi er líka faðir hans, Haraldur Ingólfsson, sem er í 36. sæti markalistans með 59 mörk, öll fyrir ÍA. Móðir hans, Jónína Víglundsdóttir, skoraði 40 mörk fyrir ÍA í efstu deild kvenna. Tryggvi hefur skipt mörkunum jafnt milli ÍA og Vals, 25 mörk fyrir hvort félag.
Úrslitin í 11. umferð:
Vestri - Valur 1:5
HK - Stjarnan 4:3
Víkingur R. - KR 1:1
KA - Fram 3:2
Breiðablik - ÍA 1:1
FH - Fylkir 3:1
Markahæstir í deildinni:
9 Patrick Pedersen, Val
8 Viktor Jónsson, ÍA
7 Emil Atlason, Stjörnunni
6 Jónatan Ingi Jónsson, Val
5 Benoný Breki Andrésson, KR
5 Danijel Dejan Djuric, Víkingi R.
5 Gylfi Þór Sigurðsson, Val
5 Jason Daði Svanþórsson, Breiðabliki
5 Sigurður Bjartur Hallsson, FH
5 Tryggvi Hrafn Haraldsson, Val
4 Ari Sigurpálsson, Víkingi R.
4 Arnþór Ari Atlason, HK
4 Aron Elís Þrándarson, Víkingi R.
4 Atli Sigurjónsson, KR
4 Björn Daníel Sverrisson, FH
4 Daníel Hafsteinsson, KA
4 Guðmundur Magnússon, Fram
4 Helgi Guðjónsson, Fram
4 Úlfur Ágúst Björnsson, FH
4 Viktor Karl Einarsson, Breiðabliki
Næstu leikir:
27.6. Vestri - Fram
27.6. Stjarnan - Víkingur R.
27.6. KR - Fylkir
28.6. HK - KA
28.6. FH - Breiðablik
28.6. ÍA - Valur