ÍA vann sterkan sigur á ÍBV, 3:1, þegar liðin áttust við í 8. umferð 1. Deildar kvenna í knattspyrnu í Akraneshöllinni í kvöld.
Með sigrinum fór ÍA upp í fjórða sæti deildarinnar, þar sem liðið er nú með 12 stig. ÍBV er áfram í níunda og næstneðsta sæti með sjö stig.
Erna Björt Elíasdóttir kom ÍA í forystu eftir rúmlega hálftíma leik.
Skömmu fyrir leikhlé varð Helena Jónsdóttir, leikmaður ÍBV, svo fyrir því óláni að setja boltann í eigið net og staðan því 2:0 í leikhléi.
Um miðjan síðari hálfleikinn minnkaði Telusila Vunipola muninn fyrir ÍBV með marki úr vítaspyrnu.
Kolfinna Eir Jónsdóttir innsiglaði svo sigurinn með þriðja marki Skagakvenna einni mínútu fyrir leikslok.