Leiknir úr Reykjavík og Þór frá Akureyri unnu bæði góða sigra í 1. deild karla í knattspyrnu í kvöld og komu sér þannig bæði upp úr fallsæti.
Leiknir var fyrir leikinn í botnsætinu en hafði betur gegn Þrótti úr Reykjavík, 3:1, og sá þannig til þess að Þróttur fór niður í botnsætið þar sem liðið er með sex stig.
Leiknir er nú í tíunda sæti með níu stig. Bæði mörkin í Breiðholtinu komu snemma leiks.
Jón Hrafn Barkarson braut ísinn á sjöundu mínútu áður en Shkelzen Veseli tvöfaldaði forystuna á 14. mínútu.
Þremur mínútum fyrir leikslok minnkaði Jörgen Pettersen muninn fyrir Þrótt en í uppbótartíma innsiglaði Omar Sowe sigur Leiknis með þriðja marki heimamanna.
Þór var fyrir leikinn í næstneðsta sæti en heimsótti nágranna sína í Dalvík/Reyni á Dalvík og vann öruggan sigur, 3:1.
Eftir sigurinn er Þór í níunda sæti með níu stig en Dalvík/Reynir fór niður í 11. og næstneðsta sæti, þar sem liðið er með sjö stig.
Elmar Þór Jónsson kom Þórsurum yfir eftir aðeins þriggja mínútna leik áður en Sigfús Fannar Gunnarsson tvöfaldaði forystuna á 25. mínútu.
Staðan var 2:0 í hálfleik en á 71. mínútu skoraði Alexander Már Þorláksson og kom gestunum frá Akureyri í 3:0.
Sex mínútum síðar minnkaði Borja López muninn fyrir Dalvík/Reyni en þar við sat.
Fjölnir heimsótti nágranna sína í Mosfellsbæ og vann sterkan 1:0-sigur.
Með sigrinum jafnaði Fjölnir við Njarðvík í toppbaráttunni og er í öðru sæti. Bæði lið eru nú með 20 stig en Njarðvík er á toppnum með betri markatölu.
Afturelding er í sjöunda sæti með 11 stig.
Axel Freyr Harðarson skoraði sigurmark Fjölnis eftir aðeins fimm mínútna leik.
ÍR gerði góða ferð á Seltjarnarnes og lagði Gróttu að velli, 3:1.
ÍR er nú í fimmta sæti með 12 stig en Grótta er í áttunda sæti með 10 stig.
Arnar Daníel Aðalsteinsson, varnarmaður Gróttu, fékk beint rautt spjald í liði Gróttu eftir aðeins 16 mínútna leik og var markalaust í leikhléi.
Í upphafi síðari hálfleik kom Tómas Orri Róbertsson tíu Gróttumönnum í forystu.
Grótta hélt ÍR í skefjum lengi vel en á 77. mínútu jafnaði Bergvin Fannar Helgason metin fyrir gestina úr Breiðholti.
Bragi Karl Bjarkason kom ÍR-ingum yfir aðeins þremur mínútum síðar og Guðjón Máni Magnússon innsiglaði sigurinn með þriðja markinu í uppbótartíma.