ÍBV vann öruggan sigur á Keflavík, 5:0, þegar liðin áttust við í 10. umferð 1. deildar karla í knattspyrnu í Vestmannaeyjum í dag. Á sama tíma hafði Leiknir úr Reykjavík betur gegn Dalvík/Reyni, 1:0, á Dalvík.
ÍBV fór með sigrinum upp fyrir Grindavík og í þriðja sæti deildarinnar, þar sem Eyjamenn eru nú með 16 stig. Keflavík er í sjöunda sæti með 11 stig.
Eftir markalausan fyrri hálfleik setti ÍBV í fluggír í þeim síðari.
Sigurður Arnar Magnússon braut ísinn áður en Oliver Heiðarsson og Arnar Breki Gunnarsson bættu við mörkum.
Víðir Þorvarðarson skoraði svo tvívegis undir lokin.
Omar Sowe reyndist hetja Leiknis á Dalvík. Skoraði hann sigurmarkið úr vítaspyrnu eftir tæplega klukkutíma leik.
Leiknir hefur nú unnið þrjá leiki í röð og er kominn í sjötta sætið, þar sem liðið er með 12 stig.
Dalvík/Reynir er í 11. og næstneðsta sæti með 11 stig.
ÍR og Þór frá Akureyri mættust loks í Breiðholti og skildu jöfn, 1:1.
ÍR er í fimmta sæti með 13 stig og Þór í níunda sæti með 10 stig.
Fannar Daði Malmquist Gíslason kom Þór í forystu eftir aðeins átta mínútna leik.
Guðjón Máni Magnússon jafnaði metin eftir tæplega klukkutíma leik og þar við sat.