Íþróttir | Íslenski fótboltinn | mbl | 2.7.2024 | 20:00 | Uppfært 20:36

Torsóttur sigur Breiðabliks

Blikar fagna Andreu Rut Bjarnadóttur þegar hún kom þeim yfir á 5. mínútu á Sauðárkróki í kvöld. Ljósmynd/Jóhann Helgi Sigmarsson

Breiðablik vann nauman sigur gegn Tindastól, 1:0 í 11. umferð Bestu deildar kvenna í knattspyrnu á Sauðárkróki í kvöld.

Úrslitin þýða að Breiðablik er enn á toppi deildarinnar með 30 stig en Tindastóll er í áttunda sæti með 10 stig.

Breiðablik byrjaði viðureignina af miklum krafti. Fyrsta færi leiksins kom á 4. mínútu en þá kom Andrea Rut Bjarnadóttir með góða fyrirgjöf á Vigdísi Lilju Kristjánsdóttur sem átti skalla yfir markið.

Mínútu síðar komst Breiðablik yfir með marki frá Andreu Rut Bjarnadóttur. Boltinn barst til hennar eftir klafs í teignum og lagði hún honum snyrtilega í fjærhornið.

Hrafnhildur Ása Halldórsdóttir úr Breiðabliki og Annika Haanpää í baráttu á Sauðárkróki í kvöld. Ljósmynd/Jóhann Helgi Sigmarsson

Vigdís Lilja Kristjánsdóttir fékk fínasta færi á 7. mínútu til að tvöfalda forystu Breiðabliks. Þá gerði hún vel og lék á varnarmann og átti síðan skot rétt framhjá markinu.

Í kjölfarið róaðist leikurinn töluvert og varð meira jafnræði milli liðanna. Heimakonur í Tindastól náðu lítið að ógna marki Blika en áttu hins vegar fínustu spilakafla.

Besta færi Tindastóls fékk Jordyn Rhodes eftir hálftímaleik. Þá fékk hún boltann í gegn frá Anikka Haanpaa, leitaði inn á vinstri fótinn og átti skot yfir. Staðan í hálfleik, 1:0 fyrir Breiðablik.

Síðari hálfleikur byrjaði eins og sá fyrri endaði. Liðin skiptust á að vera með boltann og sköpuðu sér ágætis færi.

Bryndís Rut Haraldsdóttir átti skot rétt framhjá á 49. mínútu þegar boltinn barst til hennar eftir darraðardans í teig Blika.

Jordyn Rhodes átti hörkuskot um miðbik síðari hálfleiks þegar hún fékk boltann rétt fyrir utan teig Breiðabliks en Telma Ívarsdóttir varði vel.

Á 74. mínútu fékk Jordyn Rhodes annað gott færi þegar hún fékk boltann inn fyrir vörn Breiðabliks en skot hennar fór beint í fangið á Telmu Ívarsdóttur.

Fjórum mínútum síðar var Jordyn Rhodes aftur í góðu færi þegar boltinn datt fyrir hana í teignum en Telma Ívarsdóttir sá við henni. Ótrúlegt að Rhodes hafi ekki skorað í dag eftir mörg frábær færi.

Tindastóll hélt áfram að pressa Breiðablik en án árangurs. Lokaniðurstöður í kvöld, 1:0 sigur Breiðabliks.