Vítaklúður á síðustu sekúndu sendi Víkinga úr Meistaradeildinni

Íslandsmeistarar Víkings úr Reykjavík máttu þola afskaplega svekkjandi tap fyrir Shamrock Rovers frá Írlandi, 2:1, í seinni leik liðanna í 1. umferð undankeppni Meistaradeildar karla í knattspyrnu í Dyflinni klukkan 19.

Fyrri leikurinn fór 0:0 og fer Shamrock því samanlagt 2:1 áfram og mætir Sparta Prag í annarri umferð. 

Víkingar mæta hins vegar tapliðinu úr viðureign Borac Banja Luka frá Bosníu og Egnatia frá Albaníu í 2. umferð undankeppni Sambandsdeildarinnar. 

Fyrirliðinn Nikolaj Hansen setti boltann í utanverða stöngina úr vítaspyrnu á síðustu sekúndum leiksins, en mark þar hefði tryggt framlengingu.

Afleitar 20 mínútur hjá Víkingum

Víkingar fóru vel af stað og Helgi Guðjónsson fékk strax gott færi á annarri mínútu en varnarmenn Shamrock Rovers köstuðu sér fyrir boltann. 

Góði kafli Víkinga entist ekki lengi því á áttundu mínútu leiksins kom Johnny Kenny Shamrock yfir. 

Þá fékk hann sendingu í gegn og fór afar illa með Oliver Ekroth. Hann var síðan einn gegn Ingvari Jónssyni markverði Víkinga og renndi boltanum í netið. 

Kenny var aftur á ferðinni á 20. mínútu þegar að hann fékk allan tímann í heiminum til að athafna sig inn í teig Víkinga. Hann fór í skotið sem var laust og lélegt en fór samt einhvern veginn fram hjá Ingvari og í netið, 2:0 fyrir heimamönnum. 

Shamrock lokaði á sóknarleik Víkinga restina af fyrri hálfleiknum og fór 2:0-yfir til búningsklefa. 

Góður seinni hálfleikur

Ari Sigurpálsson fékk dauðafæri á upphafsmínútum seinni hálfleiksins en hann hitti ekki boltann og setti hann yfir markið. 

Nikolaj Hansen minnkaði muninn fyrir Víkinga á 61. mínútu leiksins. Þá stangaði hann fyrirgjöf Ara snilldarlega í netið, 2:1.

Jack Bryne fékk sitt annað gula spjald og jafnframt rautt á 75. mínútu eftir tæklingu á Valdimari Þór Ingimundarsyni. Víkingar voru því manni fleiri síðustu 15 mínúturnar. 

Á síðustu sekúndum leiksins braut Roberto Lopes á Valdimari inn í teig og Jarred Gillet dómari benti á punktinn. 

Á hann steig fyrirliðinn Nikolaj en hann setti boltann í utanverða stöngina og Gillet flautaði leikinn af og Shamrock fór áfram.