Knattspyrnudeild ÍR hefur fengið sóknarmanninn Gils Gíslason að láni út leiktíðina frá FH. Gils, sem er fæddur árið 2007, hefur leikið einn leik með FH í efstu deild.
Gils er yngsti leikmaður sögunnar í efstu deild hér á landi en hann lék 14 ára og 318 daga gamall með FH gegn ÍA í lokaumferð deildarinnar haustið 2022.
Hann hefur einnig leikið með U15 og U17 ára landsliðum Íslands og skorað fjögur mörk í fjórum leikjum í landsliðstreyjunni.
ÍR-ingar hafa komið mörgum á óvart í 1. deildinni í sumar þar sem liðið er í fjórða sæti með 19 stig eftir 12 leiki, en ÍR-ingar eru nýliðar í deildinni.