Valur tryggði sér sæti í 2. umferð Sambandsdeild karla í fótbolta með útisigri á Vllaznia frá Albaníu í Shkodër í kvöld, 4:0. Liðin skildu jöfn á Hlíðarenda fyrir viku, 2:2, og vann Valur því einvígið 6:2.
Valur mætir St. Mirren frá Skotlandi í 2. umferð.
Fyrri hálfleikur var draumi líkastur hjá Val, því staðan í leikhléi var 3:0.
Kristinn Freyr Sigurðsson gerði fyrsta markið á 13. mínútu er hann kláraði með hnitmiðuðu skoti utan teigs eftir sendingu frá Guðmundi Andra Tryggvasyni.
Guðmundur var aftur á ferðinni tveimur mínútum síðar er hann gerði annað markið með góðu skoti í teignum eftir sendingu frá Jónatan Inga Jónssyni.
Tveimur mínútum eftir það átti Esat Mala hættulegustu tilraun heimamanna í hálfleiknum er hann skaut í stöng með góðu skoti af 25 metra færi.
Það voru hins vegar Valsmenn sem skoruðu þriðja mark leiksins á 36. mínútu. Daninn Patrick Pedersen sá um það eftir hræðileg mistök í vörn albanska liðsins og Valsmenn með þriggja marka forskot í hálfleik.
Vllaznia var mikið með boltann framan af í seinni hálfleik en náði ekki að skapa sér neitt.
Það voru svo Valsmenn sem skoruðu næsta mark og komust í 4:0 á 67. mínútu. Gylfi Þór Sigurðsson átti þá magnaða sendingu inn fyrir vörn Vllaznia og varamaðurinn Tryggvi Hrafn Haraldsson afgreiddi boltann í markið með stórkostlegri vippu og þar við sat.