Höskuldur Gunnlaugsson fyrirliði Breiðabliks er spenntur fyrir fyrri leik Breiðabliks gegn FC Dríta frá Kósovó í 2. umferð undankeppni Sambandsdeildarinnar í fótbolta á Kópavogsvelli annað kvöld.
Sigurvegari einvígsins mun mæta Auda frá Lettlandi eða Cliftonville frá Norður-Írlandi í 3. umferð og byrjar á útivelli.
Höskuldur segir í samtali við mbl.is að Evrópuverkefni séu alltaf spennandi.
„Evrópuleikirnir eru alltaf skemmtilegir og verða bara skemmtilegri með hverju verkefni ef eitthvað er.
Það er kominn fiðringur í hópinn fyrir þessu verkefni og við erum mjög spenntir að takast á við þetta.“
Drita sat hjá í 1. umferð Sambandsdeildarinnar og verður leikurinn annað kvöld fyrsti alvöru keppnisleikur liðsins á tímabilinu.
„Ég veit ekki hvort það breyti okkar skipulagi þannig séð. Mögulega hefur það áhrif á þá. Fyrsti keppnisleikurinn sem þeir eru að fara í á þessu tímabili.
Vonandi nýtist það okkur. Við þurfum að mæta á tánum, klárir og með háa ákefð strax frá byrjun.“
Blikaliðið hefur verið afar gott í að sækja á andstæðinga sína í Evrópu undir lok leikja og vinna þannig einvígi.
Er planið fyrir leik að sækja mikið undir lokin?
„Nei ekki beint. Þjálfarateymið lætur okkur vita um ýmsa tölfræði innan hvers leiks. Við erum ekki að einblína sérstaklega á það. Skýrist frekar að við séum í hörkustandi og erum mikið með boltann.
Lið verða þreytt þegar leikmenn verða að hlaupa mikið upp og niður og til hliðar. Þá verða skrefin hægara og þyngri með hverri mínútu sem líður. Þá verður athyglin einnig minni.“
Höskuldur segir það erfitt að dæma um gæði mótherja áður en mætt er til leiks.
„Það dæmist bara þegar maður er mættur í leikinn. Þú ferð ekki léttilega í gegnum neitt einvígi.
Drita er hörkumótherji með mikil einstaklingsgæði. Leikmenn liðsins eru kraftmiklir og góðir í skyndisóknum.
Við verðum að vera trúir okkar leikplani. Spila okkar hugrakka fótbolta. Þegar við sækjum verðum við að gera það af fullri ákefð og vera hættulegir fyrir framan markið.
Þetta snýst um hugarfar. Að við séum að pæla í því sem við getum gert vel frekar en því sem þeir gera,“ bætti Höskuldur við í samtali við mbl.is.