„Við verðum að taka þeim alvarlega,“ sagði Halldór Árnason þjálfari Breiðabliks í samtali við mbl.is á Kópavogsvelli í dag.
Halldór undirbýr lið sitt fyrir fyrri leikinn gegn FC Drita frá Kósovó í 2. umferð undankeppni Sambandsdeildarinnar.
Halldór segir að Drita sé með sterkari mótherjum sem Breiðablik hefði geta mætt.
„Drita er með sterkari mótherjum sem við gátum mætt þegar að dregið var í þessa potta.
Þetta er samt klárlega lið sem við ætlum okkur að slá út og teljum okkur eiga góðan möguleika á því.
Drita-menn hafa ekki komist langt í Evrópu undanfarin ár en þeir hafa verið að gefa þessum sterku liðum sem þeir hafa mætt góða leiki.
Við verðum að taka þeim alvarlega og ætlum að sjálfsögðu að halda þessari Evrópuvegferð sem hefur verið undanfarin ár áfram.
Í deildinni heima spila þeri af mikilli ákefð, pressa hátt. Það eru ákveðnir möguleikar í því.
Í Evrópu gegn sterkum mótherjum hafa þeir verið að fara neðar og beita skyndisóknum. Við verðum að meta það á morgun hvernig þeir mæta til leiks og vera klárir í hvoru tveggja,“ sagði Halldór.
Drita fór beint í aðra umferð Sambandsdeildarinnar vegna góðs gengis liða frá Kósovó í Evrópu undanfarin ár.
„Yfirleitt áttu tvo leiki úr fyrstu umferð til að skoða andstæðinginn. Í þetta skipti fer Drita beint í aðra umferð út af góðum liða frá Kósovó.
Þeir eru búnir að vera núna í Búlgaríu í æfingaferð þar sem þeir hafa spilað æfingaleiki. Við vitum ekki alveg stöðuna á þeim.
Hins vegar er jákvætt og ákveðið forskot að vera á miðju tímabili á meðan þeir eru að byrja þeirra.
Mikilvægt að byrja af krafti og láta þá finna fyrir því að við séum í betra leikformi en þeir.“
Ef að Breiðablik vinnur einvígið gegn Drita mætir liðið annaðhvort Auda frá Lettlandi eða Cliftonville frá Norður-Írlandi í 3. umferð og byrjar á útivelli.
Halldóri líst ágætlega á þann drátt en er ekki farinn að pæla í því.
„Til að byrja með eru þetta mörg lið sem við getum mætt. Án þess að pæla mikið í því þá lítur þetta nokkuð vel út en við getum ekki farið að pæla í því.
Það er hörkuverkefni fram undan og við leyfum okkur ekki að fara þangað strax.“
Hvað viltu sjá annað kvöld?
„Ég býst við þroskaðri og góðri frammistöðu. Ég vona að leikmennirnir verði kraftmiklir og sæki sigurinn,“ bætti Halldór við í samtali við mbl.is.