Halldór Árnason, þjálfari karlaliðs Breiðabliks, segir að gott gengi íslenskra liða í Evrópukeppni sé mikið hagsmunamál fyrir fótboltann hérlendis.
Halldór undirbýr lið sitt fyrir fyrri leikinn gegn Drita frá Kósovó í 2. umferð undankeppni Sambandsdeildarinnar sem fer fram á Kópavogsvelli annað kvöld.
Hann talaði aðeins um mikilvægi góðs árangurs í Evrópu þegar að mbl.is hitti á hann á Kópavogsvelli í dag.
„Það gefur sumrinu mikið líf að íslensku liðin séu að taka þátt. Því fleiri leikir, því skemmtilegra fyrir liðin.
Síðan er töluverður fjárhagslegur ávinningur í þessu fyrir íslenskan fótbolta. Við vorum í ruslflokki fyrir tveimur árum í einu af neðstu fjórum sætunum.
Nú erum við að hóta því að komast í kringum 33. sætið sem að gefur þá aðra möguleika.
Í staðinn fyrir að vera með eitt Meistaradeildarsæti og þrjú í Sambandsdeildinni þá er til dæmis Kósovó með eitt í Meistaradeildinni, eitt í Evrópudeildinni, eitt í annarri umferð Sambandsdeildarinnar og annað eitt í fyrstu umferð,“ sagði Halldór en hvert sæti skiptir máli.
Til að mynda er mun betra að vera í 33. sæti heldur en 36. sæti, þar sem Ísland er. Til að hækka sig í töflunni verða íslensku liðin að standa sig í Evrópu.
„Þú ert þannig með þrjú lið frá Kósovó sem eru sjálfkrafa komin í aðra umferð sama hvernig fer í fyrstu. Það segir sig sjálft að þarna eru heilmiklir fjármunir undir og tækifæri sem íslensku liðin hafa.
Við erum að keppa við lönd eins og Færeyjar, Írland, Finnland og Kosóvó um þessi mikilvægu sæti.
Við eigum að fá alla þá hjálp sem við þurfum. Það er mjög mikilvægt fyrir íslenskan fótbolta,“ sagði Halldór.