Færeyski landsliðsmaðurinn Patrik Johannesen er á förum frá Breiðabliki yfir í FH í Bestu deild karla í knattspyrnu.
Fotbolti.net greinir frá þessu en Patrik kom til liðsins frá Keflavík fyrir tímabilið 2023 en náði aðeins fimm leikjum það tímabil því hann sleit krossband í hné.
Hann hefur komið til sögu í 11 leikjum í Bestu deild á þessu tímabili og skorað eitt mark, gegn Stjörnunni í maí.
FH er að leita að framherja því Úlfur Ágúst Björnsson er að fara út til Bandaríkjanna í háskólaboltann og samkvæmt Fotbolta.net er Breiðablik að undirbúa heimkomu Árna Vilhjálmssonar sem er uppalinn Bliki og spilaði síðast með liðinu árið 2021.