Þýðir ekkert að fara að grenja núna

„Auðvitað svekkjandi að missa toppsætið en það er nóg eftir af þessu, fullt af leikjum og við eigum eftir að mætast aftur,“ sagði Ásta Eir Árnadóttir, fyrirliði Breiðabliks í Bestu deild kvenna í fótbolta, eftir 1:0 tap gegn Val á Hlíðarenda.

Með tapinu misstu Blikar toppsætið og Valur er með þriggja stiga forskot á toppnum.

 Blikar byrjuðu ekki vel í dag og Valsarar voru með yfirburði í fyrri hálfleik.

„Mér fannst við ekki nógu góðar í fyrri hálfleik. Við vorum eitthvað óöruggar á boltanum og vorum að gefa þeim of mikið pláss og upp úr því kemur markið, við misstum boltann á hættulegum stað og upp úr því kemur markið. Mér fannst við heilt yfir betri í seinni hálfleik en kannski ekki að skapa nógu mikið til þess að ná inn marki, mér fannst þetta ekki alveg nógu gott,“ sagði Ásta í samtali við mbl.is í dag.

Blikar voru stressaðir á boltann í fyrri hálfleik og uppspilið gekk illa.

Var þetta stress yfir toppbaráttunni?

„Ég veit það ekki, mögulega eitthvað en það á ekki að vera þannig. Við vitum alveg að við erum nógu góðar til þess að halda betur í boltann og færa boltann á milli svæða, við vorum svolítið ólíkar sjálfum okkur fannst mér en þetta er bara tap í dag og bara næsti leikur.

Það þýðir ekkert að fara að grenja núna, við ætlum að halda áfram það er bara þannig.“

Breiðablik og Valur hafa verið í toppbaráttu í allt sumar og ekki munað miklu á liðunum og í dag tóku Valsarar toppsætið af Val.

Breiðablik er eina liðið sem hefur sigrað Val á tímabilinu hingað til og nú þurfa Blikar að treysta á að Valur misstígi sig.

„Það getur allt gerst í þessu og það eru fullt af góðum liðum í þessari deild. Við getum ekki endalaust verið að pæla í  hvað þær eru að geta núna erum við skrefi á eftir og þurfum að klára okkar leiki og einbeita okkur að okkur.“

• Blogga um frétt