Fyrirliðar Víkings og HK náðu báðir stórum áföngum þegar lið þeirra mættust í 16. umferð Bestu deildar karla í fótbolta síðasta sunnudagskvöld og þriðji leikmaðurinn bættist í hópinn í sama leiknum.
Leifur Andri Leifsson fyrirliði HK er einn af örfáum leikmönnum sem hafa spilað 400 mótsleiki fyrir eitt félag á Íslandi og hann náði þeim áfanga í Víkingsleiknum að spila sinn 300. leik í deildakeppninni.
Af þeim eru 285 fyrir HK í þremur efstu deildunum og 15 með Ými, venslaliði HK, í 3. deildinni en þar hóf hann meistaraflokksferlinn árið 2007. Leifur hefur síðan spilað samfleytt með HK frá árinu 2009.
Nikolaj Hansen fyrirliði Víkings skoraði tvö marka Víking í öruggum sigri á HK, 5:1, og þar með varð hann fyrsti leikmaðurinn í sögu Víkings til að skora 50 mörk fyrir félagið í efstu deild. Áður hafði hann skorað fjögur mörk fyrir Val og Nikolaj er nú orðinn fjórði markahæsti erlendi leikmaðurinn í deildinni með 54 mörk, á eftir Patrick Pedersen (111), Steven Lennon (101) og Gary Martin (57).
Helgi Guðjónsson náði líka áfanga í leiknum sem var hans 100. leikur í efstu deild. Helgi skoraði eitt marka Víkings og varð með því þriðji markahæstur í sögu Víkings í efstu deild með 27 mörk, á eftir Nikolaj Hansen (50) og Heimi Karlssyni (37).
Þessi samantekt nær yfir þá leiki í 15. og 16. umferð sem voru spilaðir frá 20. til 31. júlí. Í 15. umferðinni varð Höskuldur Gunnlaugsson fjórði leikmaðurinn í sögu Breiðabliks til að skora 40 mörk í efstu deild karla, þegar hann skoraði í sigri Blika á KR, 4:2. Hinir eru Kristinn Steindórsson (59), Thomas Mikkelsen (41) og Árni Vilhjálmsson (40).
Úrslitin í 15/16. umferð:
HK - Vestri 1:1
KA - Víkingur R. 1:0
Breiðablik - KR 4:2
Stjarnan - Fylkir 2:0
FH - ÍA 1:1
Vestri - FH 0:2
ÍA - Stjarnan 1:3
Fram - Valur 4:1
Víkingur R. - HK 5:1
KR - KA 2:2
Fylkir - Fram 0:0
Markahæstir í deildinni:
13 Viktor Jónsson, ÍA
12 Patrick Pedersen, Val
8 Emil Atlason, Stjörnunni
7 Helgi Guðjónsson, Víkingi R.
7 Jónatan Ingi Jónsson, Val
6 Benoný Breki Andrésson, KR
6 Danijel Dejan Djuric, Víkingi R.
6 Guðmundur Magnússon, Fram
6 Gylfi Þór Sigurðsson, Val
6 Hallgrímur Mar Steingrímsson, KA
6 Sigurður Bjartur Hallsson, FH
5 Ari Sigurpálsson, Víkingi R.
5 Arnþór Ari Atlason, HK
5 Daníel Hafsteinsson, KA
5 Jason Daði Svanþórsson, Breiðabliki
5 Nikolaj Hansen, Víkingi R.
5 Tryggvi Hrafn Haraldsson, Val
5 Úlfur Ágúst Björnsson, FH
Næstu leikir:
6.8. KA - Valur (óvíst)
6.8. Fram - Stjarnan (óvíst)
6.8. FH - Víkingur R. (óvíst)
6.8. Breiðablik - Fylkir
7.8. Vestri - ÍA
7.8. HK - KR