Íþróttir | Íslenski fótboltinn | mbl | 11.8.2024 | 21:08

Blikar nýttu sér ekki jafntefli Víkinga

Stjörnumaðurinn Kjartan Már Kjartansson í baráttunni við Blikann Aron Bjarnason. mbl.is/Ólafur Árdal

Stjarnan og Breiðablik skildu jöfn, 2:2, í 18. umferð Bestu deildar karla í knattspyrnu í Garðabænum í kvöld.

Stjarnan er í sjöunda sæti með 24 stig en Breiðablik er í öðru sæti með 34 stig, sex stigum minna en topplið Víkingur en Kópavogsliðið á leik til góða.

Stjörnumenn voru sterkari í fyrri hálfleik en þrátt fyrir það fékk Davíð Ingvarsson í liði Breiðabliks dauðafæri á 26. mínútu þegar að hann setti boltann rétt fram hjá eftir sendingu frá Kristni Jónssyni.

Davíð fékk síðan dæmda á sig vítaspyrnu á 38. mínútu þegar að boltinn fór í höndina á honum inn í teig Breiðabliks.

Á punktinn steig Emil Atlason og skoraði örugglega, 1:0 fyrir Stjörnunni.

Viktor Karl Einarsson jafnai metin fyrir Breiðablik á 55. mínútu. Þá skoraði hann með snyrtilegu skoti út í vinstra hornið eftir sendingu frá Davíð, 1:1.

Ísak Snær Þorvaldsson kom Breiðabliki yfir á 78. mínútu leiksins. Þá gaf Davíð sýna aðra stoðsendingu, beint á Ísak sem skaut boltanum laglega í netið, 1:2.

Varamaðurinn Haukur Örn Brink hafði aðeins verið inn á í þrjár mínútur þegar að hann jafnaði metin á 84. mínútu.

Þá fékk hann sendingu inn fyrir frá Róberti Frosta Þorkelssyni og smellti boltanum í fjær, 2:2.

Stjarnan heimsækir KA eftir viku en Breiðablik heimsækir Val í stórleik næsta fimmtudagskvöld.

Lýsing uppfærist sjálfkrafa

Allar lýsingar í beinni