Framarar upp í annað sæti

Fram er komið upp í annað sæti 1. deildar kvenna í fótbolta eftir sigur á ÍBV í Vestmannaeyjum, 2:1, í kvöld.

Emma Björt Arnarsdóttir kom Fram í 1:0 á 29. mínútu en Ágústa María Valtýsdóttir jafnaði fyrir Eyjakonur á 49. mínútu. Fram átti hins vegar lokaorðið því Birna Kristín Eiríksdóttir skoraði sigurmarkið á 66. mínútu.

Selfoss gerði góða ferð í Mosfellsbæinn og vann Aftureldingu, 3:1. Unnur Dóra Bergsdóttir kom Selfossi yfir á 38. mínútu og var staðan í hálfleik 1:0.

Katrín Rut Kvaran jafnaði fyrir Aftureldingu á 62. mínútu en Katrín Ágústsdóttir og reynsluboltinn Hólmfríður Magnúsdóttir svöruðu fyrir Selfoss á lokakaflanum.

HK hafði betur gegn ÍA á heimavelli, 3:1. Olga Ingibjörg Einarsdóttir, Brookelynn Entz og Hrafnhildur Salka Pálmadóttir komu HK í 3:0 í fyrri hálfleik. Juliana Paoletti lagaði stöðuna fyrir ÍA á 56. mínútu.

Þá vann Grindavík 4:0-heimasigur á ÍR. Jada Colbert skoraði þrjú mörk fyrir Grindavík og Helga Rut Einarsdóttir komst einnig á blað.

Staðan:

1. FHL 37
2. Fram 25
3. Grótta 25
4. ÍBV 22
5. ÍA 22
6. HK 21
7. Afturelding 21
8. Grindavík 17
9. Selfoss 14
10. ÍR 5

• Blogga um frétt