Víkingur valtaði yfir Tindastól, 5:1, í 17. umferð Bestu deild kvenna í knattspyrnu í Fossvoginum í kvöld.
Úrslitin þýða að Víkingur er í fjórða sæti með 29 stig og Tindastóll er í áttunda með 12 stig.
Víkingur var með algjöra yfirburði í fyrri hálfleik og var staðan 4:0 fyrir Víking þegar flautað var til hálfleiks.
Fyrsta markið kom eftir aðeins þrjár mínútur. Þar var Linda Líf Boama að verki en Freyja Stefánsdóttir skallaði boltann á Lindu sem tók hann niður og kláraði snyrtilega í fjærhornið.
Linda Líf tvöfaldaði forystu Víkings aðeins þremur mínútum síðar. Freyja Stefánsdóttir átti fast skot sem Monica Wilhelm, markvörður Tindastól, varð út í teig og fylgdi Linda eftir.
Þriðja mark Víkings kom á 20. mínútu og var það fyrirliðinn Bergdís Sveinsdóttir sem skoraði það. Bergdís og Linda Líf áttu laglegt samspil fyrir utan teig Tindastól sem endaði með góðri afgreiðslu frá Bergdísi í neðra hægra hornið.
Þremur mínútum síðar skoraði Freyja fjórða mark Víkings. Hún fékk boltann á hægri kantinum, keyrði inn á teiginn og lagði hann í fjærhornið.
Skömmu síðar fékk Jordyn Rhodes dauðafæri til að minnka muninn. Hún komst alein í gegn á móti Sigurborgu Kötlu Sveinbjörnsdóttur, markmanni Víkings, en á einhvern ótrúlegan hátt endaði skot hennar framhjá markinu.
Shaina Ashouri setti síðasta nagla í kistu Tindastóls á 50. mínútu. Emma Steinsen Jónsdóttir átti skot sem Bergdís komst í. Hún náði tveimur skotum en Wilhelm varði bæði. Boltinn datt síðan fyrir Ashouri sem kláraði í autt markið af stuttu færi.
Tindastóll fékk víti á 89. mínútu þegar Frederikke Sökjær, dómari leiksins, benti á punktinn. Sigurborg Katla varði víti Elise Anne Morris en Elísa Bríet Björnsdóttir fylgdi eftir og kláraði í opið markið.