Íþróttir | Íslenski fótboltinn | mbl | 19.8.2024 | 21:11

Skagamenn skelltu Víkingum í Fossvogi

Haukur Andri Haraldsson og Óskar Örn Hauksson eigast við í kvöld. mbl.is/Eggert Jóhannesson

ÍA vann gífurlega sterkan sigur á Íslands- og bikarmeisturum Víkings úr Reykjavík, 2:1, í Bestu deild karla í fótbolta á Víkingsvelli í Fossvogi í kvöld.

ÍA er þar með fyrsta liðið til að sigra Víking í Fossvoginum á tímabilinu.

Víkingur er enn í toppsætinu með 40 stig en Breiðablik er búið að jafna Víking að stigum. ÍA er í fjórða sæti með 31 stig, stigi á eftir Val.

Valdimar Þór Ingimundarson kom Víkingi yfir á sjöttu mínútu leiksins með góðu skallamarki eftir frábæra fyrirgjöf frá Óskari Erni Haukssyni, 1:0.

Skagamenn voru ekki lengi að jafna því aðeins þremur mínútum síðar kom Hinrik Harðarson boltanum á Inga Þór Sigurðsson sem afgreiddi færið með glæsibrag, 1:1.

Viktor Jónsson kom Skagamönnum yfir á 38. mínútu leiksins. Þá voru hann og Hinrik Harðarson einir gegn Oliver Ekroth. Hinrik renndi boltanum á Viktor sem skoraði í opið, 1:2.

Víkingar gerðu heilar fjórar breytingar í hálfleik og voru sprækari fyrir vikið.

Aron Elís Þrándarson fékk algjört dauðafæri á 75. mínútu þegar að boltinn datt fyrir hann í teig Skagamanna. Aron setti boltann hins vegar í utanverða stöngina.

Valdimar Þór fékk svo dauðafæri undir blálok leiks en Hilmar Elís Hilmarsson bjargaði glæsilega á línu.

Víkingur mætir UE Santa Coloma frá Andorra í umspili um sæti í Sambandsdeildinni á fimmtudaginn kemur. ÍA fær Breiðablik í heimsókn næstu helgi.

Valdimar Þór Ingimundarson fagnar marki sínu í kvöld. mbl.is/Eggert Jóhannesson

Lýsing uppfærist sjálfkrafa

Allar lýsingar í beinni

Aðrir virkir leikir

FH	2:2	Valur	Skoða leik
90. mín. Kristinn Freyr Sigurðsson (Valur) skorar +4. 1:2.Valsmenn brunuðu í sókn og Birkir Már Sævarsson gaf boltann fyrir markið. Boltinn hrökk af varnarmanni fyrir fæturnar á Kristinn Frey Lárusson sem skoraði glæsilegt mark.
Augnablik — sæki gögn...