Guðrún Jóna Kristjánsdóttir stýrir kvennaliði Keflavíkur í fótbolta út yfirstandandi tímabil. Jonathan Glenn var vikið frá störfum fyrr í vikunni.
Keflvíkingar leituðu ekki langt því Guðrún var aðstoðarþjálfari liðsins. Leikmaðurinn Caroline Van Slambrouck verður Guðrúnu til halds og trausts og verður nýr aðstoðarþjálfari.
Guðrún lék á sínum tíma 177 leiki í efstu deild með KR og skoraði í þeim 68 mörk. Hún hefur m.a. þjálfað FH, Þrótt og Hauka.
Keflavík er í botnsæti Bestu deildarinnar með níu stig eftir 17 leiki, þremur stigum frá Tindastóli og öruggu sæti þegar fjórar umferðir eru eftir.