Knattspyrnukonan Erica Cunningham er komin með leikheimild hjá Tindastóli, þrettán dögum eftir að félagaskiptaglugganum var lokað.
Cunningham er 31 árs varnarmaður. Hún er fædd í San Francisco í Bandaríkjunum en hefur leikið með landsliði Níkaragva.
Hún hóf atvinnumannaferilinn með Lugano og Zürich í Sviss. Þá hefur hún einnig leikið með Norrköping í Svíþjóð, Blackburn á Englandi og Eastern Flames í Sádi-Arabíu.
„Þetta festist aðeins í kerfinu og við höfum verið að bíða eftir FIFA,“ sagði Donni Sigurðsson þjálfari Tindastóls í samtali við Fótbolta.net.
Tindastóll á aðeins þrjá leiki eftir af tímabilinu en liðið er sem stendur í áttunda sæti, þremur stigum fyrir ofan fallsæti.