Sigur Vals á Ljuboten frá Norður-Makedóníu í undanúrslitum 1. umferðar Meistaradeildar kvenna í fótbolta í Hollandi í dag er þriðji stærsti sigur íslensks liðs í Evrópukeppni frá upphafi.
Hinir tveir sigrarnir komu líka gegn liðum frá Norður-Makedóníu.
Stjarnan sigraði Istatov, 11:0, árið 2017 og Breiðablik sigraði Dragon, 11:0, árið 2019. Nú hafa því þrjú íslensk lið náð tveggja stafa tölu í leik í Evrópukeppni kvenna.
Valskonur eru um leið eina liðið sem hefur bæði skorað og fengið á sig tveggja stafa tölu í Evrópukeppni. Valur tapaði 11:1 fyrir þýska stórliðinu Turbine Potsdam árið 2005 og það er stærsta tap íslensks kvennaliðs frá upphafi.