Fylkir er fallinn úr Bestu deild kvenna í knattspyrnu eftir 3:0- tap gegn Tindastól á Sauðárkróki í dag. Keflavík er einnig fallið úr deildinni eftir 4:4 jafntefli gegn Stjörnunni í dag.
Tindastóll er í áttunda sæti með 19 stig en Fylkir í níunda með 13 stig þegar ein umferð er eftir.
Tindastóll tók forystuna á fyrstu mínútu leiksins með marki frá Elísu Bríeti Björnsdóttur. Laufey Harpa Halldórsdóttir átti glæsilega sendingu inn fyrir á Elísu Bríeti sem kláraði snyrtilega framhjá Tinnu Brá Magnúsdóttur í marki Fylkis.
Elísa Bríet Björnsdóttir tvöfaldaði forystu Tindastóls á 21. mínútu með sínu öðru marki. Elise Anne Morris átti góða sendingu yfir vörn Fylkis á Elísu Bríeti sem vippaði boltanum yfir Tinnu Brá.
Aðeins sjö mínútum síðar skoraði Gabrielle Johnson þriðja mark Tindastóls. Það kom eftir góðan undirbúning frá Jordyn Rhodes sem lagði boltann á Johnson og hún hamraði boltanum í fjærhornið.
Staðan í hálfleik, 3:0, Tindastól í vil og útlitið því svart fyrir Fylki.
Meira jafnræði var á milli liðanna í síðari hálfleik. Fylkir var meira með boltann en náði ekki að skapa sér nein dauðafæri.
Besta færi síðari hálfleiksins fékk varamaðurinn Aldís María Jóhannsdóttir. Hún slapp ein í gegn, fór framhjá Tinnu Brá í marki Fylkis og var með autt mark fyrir framan sig en skaut í stöngina.
Tindastóll var líklegra að bæta við öðru marki en Fylkir að minnka muninn. Mörkin urðu ekki fleiri í dag og því lokaniðurstöður 3:0 sigur Tindastóls.