Herjólfur og Ísfélagið í Vestmannaeyjum hafa ákveðið að bjóða upp á fría ferð í Herjólf og fría rútuferð á leik Leiknis úr Reykjavík og ÍBV í Breiðholti í lokaumferð 1. deildar karla í knattspyrnu á laugardag.
ÍBV trónir á toppi deildarinnar, einu stigi fyrir ofan Fjölni í öðru sæti.
Með sigri í Breiðholtinu tryggir ÍBV sér sigur í deildinni og um leið sæti í Bestu deildinni að nýju á meðan liðin í 2. til 5. sæti fara í umspil um eitt laust sæti til viðbótar.
Leikurinn hefst klukkan 14 næstkomandi laugardag 14. september. Lagt verður af stað frá Vestmannaeyjum klukkan 9.30 og farið verður til baka klukkan 18.15.
Allar nánari upplýsingar um skráningu í ferðina má finna á heimasíðu Tíguls, bæjarblaði Vestmannaeyja.