Guðmundur í bann en Böðvar slapp

Guðmundur Kristjánsson, leikmaður Stjörnunnar, hefur verið úrskurðaður í eins leiks bann fyrir að hafa veitt Böðvari Böðvarssyni, leikmanni FH, kjaftshögg í leik liðanna í Bestu deildinni í knattspyrnu í byrjun mánaðarins.

Böðvar hafði skömmu áður veitt Guðmundi olnbogaskot en var ekki veitt refsing fyrir það. Hvorugum leikmanni var refsað á meðan leiknum stóð og ekki minnst á atvikið í skýrslu dómarans Péturs Guðmundssonar eftir hann. Hefur Pétur því að öllum líkindum ekki séð atvikið.

Frétt af mbl.is

Slagsmálunum vísað til aganefndar KSÍ

Því tók málskotsnefnd KSÍ málið fyrir og vísaði því til aga- og úrskurðarnefndar sambandsins með hliðsjón af myndbandsupptökum frá Stöð 2 Sport, þar sem sést vel hvað átti sér stað.

Í úrskurði aga- og úrskurðarnefndar segir að Guðmundur hafi sýnt af sér alvarlega grófan og hættulegan leik með því að slæma hönd sinni í höfuð Böðvars.

Mat nefndarinnar er þá að olnbogaskot Böðvars uppfylli ekki áskilnað um alvarlegt agabrot.

• Blogga um frétt