Glæsimark réð úrslitum á Akureyri

Valskonur unnu góðan 1:0-sigur á Þór/KA í Bestu deild kvenna á KA-vellinum á Akureyri í dag.

Valur er þá með 53 stig og er í toppsætinu sem stendur. Breiðablik getur endurheimt toppsætið ef liðið sigrar Þrótt í seinni leik dagsins.

Fyrri hálfleikurinn var meira og minna eign Valskvenna. Þær stormuðu upp völlinn hvað eftir annað á upphafsmínútunum og strax á 9. mínútu kom mark. Anna Rakel Pétursdóttir þrumaði boltanum upp í samskeytin á marki Þórs/KA eftir undirbúning og fyrirgjöf frá Jasmín Erlu Ingadóttur.

Margrét Árnadóttir og Fanndís Friðriksdóttir í leiknum í kvöld. Ljósmynd/Þórir Tryggvason

Fleiri mörk komu ekki í hálfleiknum þrátt fyrir ágætis færi Valskvenna. Þær sóttu stöðugt upp hægri kantinn þar sem Angela Mary Helgadóttir átti erfitt uppdráttar í vörn Þórs/KA.

Heimakonur sýndu fátt merkilegt í fyrri hálfleik. Samspil þeirra var ekki nógu gott og alla yfirvegun vantaði hjá leikmönnum til að gera eitthvað skemmtilegt með boltann.

Valur var mun betri í seinni hálfleiknum og það virtist bara tímaspursmál hvenær næsta mark kæmi. Færin urðu nokkur og var Anna Rakel áfjáð í að skora annað mark. Shelby Money þurfti að standa sína plikt í marki Þórs/KA og kom hún í veg fyrir að Valskonur skoruðu.

1:0 forskot er brothætt og þegar lið nýtir ekki færin sín getur það komið þeim í koll. Heimakonur voru hins vegar aldrei líklegar til að skora.

Valur fékk gullið færi á að bæta við marki á lokamínútu venjulegs leiktíma þegar Sigurður Hjörtur dómari sá ástæðu til að flauta vítaspyrnu. Jasmín Erla hitti ekki markið og því stóð enn 1:0.
Það urðu svo lokatölur leiksins.

Þór/KA	0:1	Valur	Opna lýsingu Loka
90. mín. Jasmín Erla Ingadóttir (Valur) skorar ekki úr víti Hún skýtur framhjá markinu.
Augnablik — sæki gögn...

• Blogga um frétt