Arnór Sigurðsson, kantmaður Blackburn Rovers og íslenska landsliðsins, er ekki í leikmannahópi íslenska landsliðsins sem Åge Hareide tilkynnti í dag.
Á fjarfundi á Teams í dag tilkynnti Hareide að Arnór væri enn að glíma við eftirköst þess að hafa veikst í síðasta landsliðsverkefni í síðasta mánuði.
Kom hann inn á sem varamaður í sigri á Svartfjallalandi á heimavelli en kom ekki við sögu gegn Tyrklandi á útivelli.
Arnór hefur ekki spilað neitt með Blackburn síðan þá og tekur því ekki þátt í leikjum gegn Wales og Tyrklandi í Þjóðadeild Evrópu síðar í þessum mánuði.
Hann var þó á varamannabekknum hjá Blackburn í ensku B-deildinni í gær, án þess að koma við sögu, og virðist því vera að rofa til hjá Skagamanninum.