Velski knattspyrnumaðurinn Joe Allen er hættur við að hætta að spila fyrir landslið þjóðarinnar og verður hann í hópnum sem mætir Íslandi og Svartfjallalandi í Þjóðadeildinni síðar í mánuðinum.
Hinn 34 ára gamli Allen hætti með landsliðinu eftir HM í Katar í lok árs 2022. Craig Bellamy landsliðsþjálfari Wales hefur hins vegar náð að sannfæra Allen um endurkomu.
Hann er leikmaður uppeldisfélagsins Swansea um þessar mundir, en hann lék yfir 300 leiki í ensku úrvalsdeildinni með Liverpool og Stoke.
Wales verður án miðjumannanna Aaron Ramsey og Ethan Ampadu gegn Íslandi og eru fréttirnar því kærkomnar fyrir velska liðið.
Ísland og Wales eigast við á Laugardalsvelli föstudaginn 11. október.