„Það var gaman að spila þennan leik og mér leið ótrúlega vel inni á vellinum,“ sagði Andri Lucas Guðjohnsen, annar af markaskorurum Íslands í tapinu gegn Tyrklandi, 4:2, í Þjóðadeild karla í fótbolta á Laugardalsvelli í kvöld.
„Mér finnst við ekki hafa átt að tapa þessum leik 4:2. Það eru ósanngjörn úrslit. Þetta var kaflaskipt í seinni þegar menn voru orðnir þreyttir. Þetta var fram og til baka. Bæði lið fengu sín tækifæri. Þeir nýtu sín færi betur og refsuðu okkar mistökum,“ sagði Andri.
Hann jafnaði í 2:2 í seinni hálfleik, en Tyrkland svaraði með tveimur mörkum undir lokin. „Ég hafði fulla trú á að við gætum unnið þennan leik og sérstaklega eftir að ég jafna í 2:2. Það var geggjað fyrir mig eftir að ég gaf víti hinum megin. Svona hlutir gerast.“
Tyrkland komst í 2:1 með marki úr víti sem dæmt var á Andra, en hann fékk boltann í höndina innan teigs.
„Ég fór upp í skallabolta og skil eftir höndina í ónáttúrulegri stöðu. Svona gerist og þegar það gerist snýst allt um að koma sér aftur inn í leikinn og ég er ánægður með að hafa náð því,“ sagði Andri, sem var mjög ánægður með markið sitt.
„Þetta var frábært mark. Ég réðst almennilega á boltann. Ég vann skallaboltann á móti varnarmanninum og markverðinum sem kom út. Ég hoppa hærra og þetta var flott mark.“
Andri og Orri Steinn Óskarsson virðast ná mjög vel saman í framlínu íslenska liðsins.
„Það er mjög skemmtilegt að spila með honum. Við erum mjög góðir vinir og hann er frábær leikmaður. Ég er byrjaður að læra á hann. Ég get verið aðeins aftar og leyft honum að vera nær markinu. Þá get ég unnið í kringum hann. Svo er geggjað að hafa tvo framherja í teignum. Við vorum tveir klárir þegar ég skoraði.“
Ísland vildi fá víti í seinni hálfleik þegar Orri Steinn var við það að skora en varnarmaður Tyrklands varði boltann með hendinni.
„Það er pirrandi og óskiljanlegt að hann hafi ekki skoðað atvikið í skjánum. Það er lítið hægt að gera í því og svo vildi hann ekki leyfa okkur að tala við sig til að fá útskýringar. Hann dæmir og það er lítið sem við getum gert,“ sagði Andri.