Íþróttir | Íslenski fótboltinn | Morgunblaðið | 14.11.2024 | 12:43

Skalf úr kulda á Spáni

Elvar Geir Magnússon hjá Fótbolta.net ásamt kuldalegum Jóhanni Inga á æfingu landsliðsins í Alicante í gær. Ljósmynd/Hafliði Breiðfjörð

Bakvörður dagsins fékk bestu fréttir ársins á dögunum þegar honum var tjáð að hann væri á leiðinni til Spánar að fylgja íslenska karlalandsliðinu í fótbolta í nóvember. Spánn í nóvember hljómar mun betur en Ísland í nóvember.

Á glæsilegu hóteli íslenska liðsins í næsta bæ við Alicante er allt til alls; sundlaugar, nudd og golfvöllur. Ég skil vel hvers vegna landsliðsfyrirliðinn Jóhann Berg Guðmundsson gifti sig á sama hóteli.

Bakvörður dagsins var ekki með hlý föt í huga þegar hann pakkaði í tösku fyrir ferðina. Stuttbuxur og léttir bolir ættu nú að duga á Spáni, er það ekki?

Annað kom á daginn og skalf bakvörður dagsins úr kulda allan tímann sem hann fékk að fylgjast með æfingu íslenska liðsins í gær. Það var þungskýjað, lágt hitastig og rigning (og þrumur og eldingar) á köflum.

Starfsfólk og jafnvel leikmenn hlógu aðeins að bakverði og hann átti það fyllilega skilið. Hann hefði sennilega hlegið að öðrum undir sömu kringumstæðum.

Bakvörð Jóhanns má lesa í heild sinni í Morgunblaðinu í dag.