Víkingar svara skætingi The Sun - Nýtum norðurljósin

Víkingar hafa brugðist við frétt enska götublaðsins The Sun sem sendi þeim háðsglósur vegna aðstöðunnar á Kópavogsvelli, þar sem Víkingar leika heimaleiki sína í Sambandsdeildinni í fótbolta.

Á Facebook-síðu The Sun var grínast með að Víkingar yrðu að spila alla heimaleiki sína fyrr um dag þar sem þeir væru ekki með flóðljós.

Víkingar hafa nú svarað með færslu á samfélagsmiðlum þar sem þeir segja:

Í ljósi nýjustu frétta frá The Sun þá teljum við óumflýjanlegt að tilkynna um áætlanir félagsins varðandi flóðljós á heimavelli okkar.

Síðustu mánuði hefur þrotlaus vinna verið í gangi til að nýta orkuna úr norðurljósunum sem orkugjafa fyrir flóðljós vallarins. Vísindasamfélagið telur lausnina vera í sjónmáli og því gleður það okkur að tilkynna að hér er samþykkt teikning af væntri framtíðarlausn á þessu leiðinda vandamáli.

Enn er unnið að lausn á því að færa markið til vinstri á myndinni til móts við markið hægra megin á myndinni. Við erum vongóð að sú lausn finnist fljótlega.

• Blogga um frétt