„Við þurfum að þora“

„Maður vill ná í stig á heima­velli, helst þrjú, en í dag voru Skaga­menn grimm­ari en við og náðu að knýja fram þetta eina mark sem kom eft­ir fast leik­atriði,“ sagði Rún­ar Krist­ins­son þjálf­ari Fram í Bestu deild karla eft­ir 1:0 tap gegn ÍA á heima­velli í kvöld.

„Fyrri hálfleik­ur var ekki nógu góður. Við spiluðum ekki með jörðinni eins og við vild­um. Lang­ir og háir bolt­ar í þess­um vindi, sem við vor­um með í bakið, fara bara út af eða í hend­ur mark­manns­ins,“ sagði Rún­ar í viðtali við mbl.is eft­ir leik­inn.

Frétt af mbl.is

ÍA hafði bet­ur gegn Fram

„Við spiluðum ekki nógu vel út úr stöðum en Skaga­menn voru bara grimm­ari en við í fyrri hálfleik, það voru meiri læti í þeim og ég ætla ekki að segja að þeir vildu þetta meira en þeir börðust ógeðslega vel og fengu þetta eina mark beint úr auka­spyrn­una sem þú get­ur aldrei gert neitt í. 

Það er erfitt að stoppa auka­spyrnu fyr­ir utan víta­teig. Þetta var flott mark og þetta er ekki á mark­mann­in­um eða varn­ar­veggn­um, þetta er bara eitt­hvað sem ger­ist í fót­bolta, við verðum bara að skoða það sem gerðist áður en við feng­um auka­spyrn­una, þar verða mis­tök til en fót­bolti er bara þannig að mörk eru skoruð þegar ein­hver ger­ir mis­tök.

Þetta er bara flott tek­in auka­spyrna en í síðari hálfleik þá pressuðum við þá grimmt, erum meira með bolt­ann og fáum færi til að jafna en það lukk­ast ekki og þess vegna end­ar þetta svona.“ 

Rún­ar Már Sig­ur­jóns­son í leikn­um í kvöld. Ljós­mynd/​Krist­inn Steinn

„Við vor­um betri í seinni hálfleik miðað við fyrri en samt get­um við bet­ur. Við þurf­um að þora meira strax í upp­hafi leikja, við vor­um rag­ir til að byrja með og þorðum ekki að spila en gerðum það í síðari hálfleik og fannst mér við gera það vel. Við kom­um okk­ur margoft í góðar stöður í kring­um víta­teig­inn þeirra og fullt af góðum fyr­ir­gjöf­um og okk­ur vantaði bara að binda enda­hnút­inn á ein­hverja sókn­ina til þess að ná að jafna.“

Þetta er ekki drauma­byrj­un hjá Fram sem er af flest­um spáð sæti í neðri hluta deild­ar­inn­ar.

„Við erum með lið til þess að vera í efri hlut­an­um og höf­um trú á því að við get­um farið þangað.“

• Blogga um frétt