Öfundsjúkur út í kærustuna
Setja bókamerki
„Leikurinn gegn Belgunum leggst virkilega vel í mig og ég held að við séum að fara vinna þennan leik,“ sagði Kristján Sigurðsson, kærasti landsliðs- og knattspyrnukonunnar Berglindar Bjargar Þorvaldsdóttur, í samtali við mbl.is í Manchester á Englandi í dag.
Kristján var mættur ásamt fjölda íslendinga á Fanzone í Piccadilly Gardens í miðborg Manchester þar sem hitað var upp fyrir fyrsta leik Íslands gegn Belgíu í D-riðli Evrópumótsins en leikurinn hefst klukkan 17 að staðartíma.
„Ég er ótrúlega stoltur af henni og svo verð ég líka að segja það að ég öfunda hana ógeðslega mikið,“ sagði Kristján léttur.
„Að spila á stórmóti fyrir landið sitt er eitthvað sem alla dreymir um þegar að þeir eru að alast upp en á sama tíma er ótrúlega gaman að upplifa þetta í gegnum hana.
Ég er hrikalega bjartsýnn fyrir hönd íslenska liðsins og ef allt gengur að óskum í dag eru liðinu allir vegir færir,“ bætti Kristján við.
